هاتجن - سيد مكاوى
كلمات: بيرم التونسى
تلحين: زكريا احمد
الاصدار فى: البوم شاورلى
Lyrics by: Bayram al-TunsiComposed by: Zakaria Ahmed
هتجن با ريت يا خوانا ما رحتش لندن ولا باريز
دي بلاد تمدين و نضافة وذو ق ولطافة وحاجة تغيظ
ما لاقيتش جدع متعافي وحافي وماشي يقشر خس
ولا شحط مشمرخ أفندي معاه عود خلفة ونازل مص
ولا لب أسمر وسوداني وحمص وانزل يا تقزقيز
هتجن با ريت يا خوانا ما رحتش لندن ولا باريز
ولا عركة في نصف الليل دايرة بالحيل وساحبها بوليس
قدامها جدع متجرجر و شه معور قال ده عريس
الخلق ما هي بتتجوز واشمعنى احنا مفيش تمييز
هتجن با ريت يا خوانا ما رحتش لندن ولا باريز
و لا واحدة في وش الفجر تيرطع ماليه الدنيا صوات
قال ايه جوز خالتي أم أحمد سلفة أخوها السيد مات
سبحانك ما أعظم شانك والله الموت ده مفيد ولذيذ
هتجن با ريت يا خوانا ما رحتش لندن و الا باريز
و لاصايع طالع يجري وصايع تاني بيجري وراه
و يقول هأع حصلتك يا بن الأبصر إيه عاملاه
لا الشارع غيط يا خوانا ولا احنا بدارى و لا احنا معيز
هتجن با ريت يا خوانا ما رحتش لندن ولا باريز
ولا حد بيبع حاجة يقول بريال و تاخدها بصاغ
يا خوانا حتى الإبرة تاخدها بدوشة وقلب دماغ
حلفان وعراك ومناهدة ويمكن ضرب كفوف يا حفيظ
هتجن با ريت يا خوانا ما رحتش لندن ولا باريز
ولا شفتش ده اللي بلاسة وده اللي بعمة وده بطربوش
ملابسنا يا ناس تشكيلة تعد اصحابها ما يتعدوش
دول ناس كنا أحسن منهم قول ومسيرنا باذن الله
نبقى احسن منهم برضك بعد الدرس اللي أخدناه
و الله ده عيب نتهجى دروس يا أساتذة على التلاميذ
هتجن يا ريت يا خوانا مارحتش لندن ولا باريز
