مقدمة ونهاية مسلسل ارابيسك - حسن فؤاد

مقدمة ونهاية مسلسل ارابيسك - حسن فؤاد

كلمات: سيد حجاب

تلحين: عمار الشريعى

سنة الاصدار: 1994

الاصدار فى: مسلسل ارابيسك

Lyrics by: Sayed Higab

Composed by: Ammar al-Sherei

Year: 1994

وينفلت من بين إيدينا الزمان

كأنه سَحبة قوس فى أوتار كمان

وتنفرط ليّام.. عقود كهرمان

يتفرفط النور.. والحنان.. والأمان

وينفلت من بين إيدينا الزمان

الشر.. شرَّق وغرَّب.. داخل في حوشنا

حوشوا.. لا ريح شاردة تقشقش عشوشنا

حوشوا.. شرارة تطيش.. تشقق عروشنا

وتغشنا المرايات.. تشوش وشوشنا

وتهيل تراب ع الهالة والهيلمان

وينفلت من بين إيدينا الزمان

الغش طرطش.. رش ع الوش بُوية

ما دريتش مين بلياتشو.. أو مين رزين

شاب الزمان.. وشقيقى مش شكل أبويا

شاهت وشوشنا.. تهنا بين شين وزين

ولسه ياما وياما حنشوف كمان

وينفلت من بين إيدينا الزمان

ويرفرف العمر الجميل الحنون

ويفر، ويفرفر في رفة قانون

وندور، نلف ما بين حقيقة وظنون

وبين آسى هفاف وهفة جنون

ويرفرف العمر الجميل الحنون

دنياك سكك، حافظ علي مسلكك

وامسك في نفسك لا العلل تمسكك

وتقع ف خية تملكك، تهلكك

أهلك، يا تهلك دا انت بالناس تكون

ويرفرف العمر الجميل الحنون

إن درت ضهرك للزمن يتركك

لكن سنابك مهرته تفركك

وإن درت وشك للحياة تسبكك

والخير يجيك بالكوم وهمك يهون

ويرفرف العمر الجميل الحنون