البحر بيضحك ليه - الشيخ امام
كلمات: نجيب سرور
تلحين: الشيخ امام
Lyrics by: Naguib SurourComposed by: Sheikh Imam
البحر بيضحك ليه
وأنا نازلة أتدلع أملى القلل
البحر غضبان ما بيضحكش
أصل الحكاية ما تضحكش
البحر جرحه ما بيدبلش
وجرحنا ولا عمره دبل
البحر بيضحك ليه
وأنا نازلة أتدلع أملى القلل
مساكين بنضحك م البلوة
زي الديوك والروح حلوة
سرقاها م السكين حموة
ولسه جوا القلب أمل
البحر بيضحك ليه
و أنا نازلة أتدلع أملى القلل
قللنا فخارها قناوي
بتقول حكاوي وغناوي
يا قلة الذل اللى أنا ناوي
ما أشرب ولو في الميّة عسل
البحر بيضحك ليه
و أنا نازلة أتدلع أملى القلل
ياما ملينا وملينا
لغيرنا وعطشنا سقينا
صابريــن وبحر ما يروينا
شايلين بدال العلة علل
والبحر بيضحك ليه
وأنا نازلة أتدلع أملى القلل
في بالي ياما وعلى بالي
وإللى بيعشق ما يبالي
ما يهمينيش من عزالي
يا حلوة لو مرسالي وصل
والبحر بيضحك ليه
وأنا نازلة أتدلع أملى القلل
بيني وبينك سور ورا سور
وأنا لا مارد ولا عصفور
في إيدي ناي و الناي مكسور
وصبحت أنا في العشق مثل
والبحر بيضحك ليه
وأنا نازلة أتدلع أملى القلل
