نيكسون بابا - الشيخ امام
كلمات: احمد فؤاد نجم
تلحين: الشيخ امام
سنة الاصدار: 1972
Lyrics by: Ahmed Fouad NegmComposed by: Sheikh Imam
Year: 1972
شرفت يا نيكسون بابا
يا بتاع الووتر جيت
عملولك قيمه وسيما
سلاطين الفول والزيت
فرشولك أوسع سكه
من راس التين على مكه
وهناك تنفد على عكا
ويقولوا عليك حجيت
ما هو مولد ساير داير
شي الله يا صحاب البيت
جواسيسك يوم تشريفك
عملولك زفه وزار
تتقصع فيه المومس
والقارح والمندار
والشيخ شمهورش راكب
ع الكوديا وهات يا مواكب
وبواقي الزفه عناكب
ساحبين من تحت الحيط
واهو مولد ساير داير
شي الله يا اصحاب البيت
عزموك فقالوا تعالى
تاكل بامبون وهريسه
قمت انت لأنك مهيف
صدقت ان احنا فريسه
طبيت لحقوك بالزفه
يا عريس الغفله يا خفه
هات وشك خد لك تفه
شوبش من صاحب البيت
واهو مولد ساير داير
شي الله يا اصحاب البيت
خد مني كلام يبقى لك
ولو انك مش حتعيش
لا حقول اهلا ولا جهلا
ولا تيجي ولا متجيش
بيقولوا اللحم المصري
مطرح ما بيسري بيهري
ودا من تأثير الكشري
والفول والسوس أبو زيت
واهو مولد ساير داير
شي الله يا اصحاب البيت