اراجوز المدارس - عمر الشريف

اراجوز المدارس - عمر الشريف

كلمات: سيد حجاب

تلحين: عمار الشريعى

سنة الاصدار: 1989

الاصدار في: فيلم الاراجوز

Lyrics by: Sayed Higab
Composed by: Ammar al-Sherei
Year: 1989
Released in: Al-aragoz (The Puppeteer) film

ده أراجوز المدارس

دا نوارة المجالس

فارس ولا زيي فارس

أواجه لا أوالس

داري بحالنا ودارس

وعلى جروح روحنا دايس

وهيحكي لنا حكاية

عن واد لايص وحايس

واحكي يا بن المدارس

الواد عواد ياهوه

همّل في أرض أبوه

والأرض عرض واللي يفوت أرضه يتوه

الأرض الشابة بارت

قام جرفها استدارت

وفلوس تجريفها طارت

وقعد يائس وخانس

واحكي يا بن المدارس

ولأن الفقر كافر

خد بعضه وراح مسافر

لبلاد الجاز وعافر

ورجع وخيره وافر

جاب مروحة وراديو

وجهاز تسجيل وفيديو

شهرين وجيوبه فضيوا

وقعد يائس وخانس

واحكي يا بن المدارس

يعني معنى الحكاية

اللي يبيع في البداية

يضيع قبل النهاية

ويدوخ دوخة الولايا

ومعنى القصة برضه

اللي يفرط في أرضه

يبقى فرط في عرضه

وافهم يا ابو مخ يابس

واحكي يا بن المدارس

ده أراجوز المدارس

دا نوارة المجالس

فارس ولا زيي فارس

أواجه لا أوالس

داري بروحنا ودارس

وعلى جروح روحنا دايس

كده وفهمنا الحكاية

عن واد لايص وحايس

تسلم يا بن المدارس