هو شى منه - الشيخ امام

هو شى منه - الشيخ امام

كلمات: احمد فؤاد نجم

تلحين: الشيخ امام

سنة الاصدار: 1969

Lyrics by: Ahmed Fouad Negm
Composed by: Sheikh Imam
Year: 1969

يادى العجب يارجب

يامرتب الحكايات

اسمع وشوف واندهش

واكتبها فى الكتبات

عسى الكلام ينقرى

لو قلبوا الصفحات

خلى الشعوب والدول

تتعلم البطولات

الحزن طول عمرنا

له من حياتنا حياه

نقضيها فى النهنهه

ونضيع الأوقات

نبكى على اللى مضى

ونعيش مع اللى فات

شوف العجب يارجب

واعجب من الروايات

شعب الملاحم بكى

نزلت دموعه دانات

ع الظالم المفترى

حلفت عليه ما يبات

اول ما طار الخبر

بين الجنود اشاعات

دمع البارود انهمر

دفعات ورا دفعات

واحده تصيب العدا

تردى العدا عشرات

والتانيه من عفوها

زعق الفضا زعقات

والتالته تحمى السما

من فانتوم الخواجات

والرابعه من بعدها

المية والألفات

فى الأرض والسموات

يغسل طريق البشر

ويبدد الحشرات

ولما ذاع الخبر واتأكد الخبر

صاح السلاح فى الحرس

قال هوشى منه مات

الحاكم اللى زهد فى الملك واللذات

و الزاهد اللى حكم ضد الهوى واللذات

مات المسيح النبى

ويهوذا بالألوفات

مات الصديق الوفى

للخضره والغابات

مات بس فات للأمل

فوق الطريق علامات

لو سار عليها العمل

طول الطريق بثبات

تهدى الطريق سكته

وتقرب المسافات

- كتبت في رثاء "هو شي منه" قائد المقاومة في فيتنام أثناء الاستعمار الإمبريالي الأميركي