صباح الخير - الشيخ امام
كلمات: احمد فؤاد نجم
تلحين: الشيخ امام
سنة الاصدار: 1973
Lyrics by: Ahmed Fouad Negm
Composed by: Sheikh Imam
Year: 1973
Composed by: Sheikh Imam
Year: 1973
صباح الخير على الورد اللي فتح في جناين مصر
صباح العندليب يشدي بألحان السبوع يا مصر
صباح الدايه واللفه
ورش الملح في الزفه
صباح يطلع بأعلامنا من القلعة لباب النصر
سلامتك يا مه يا مهرة
يا حبالة.. يا ولادة
يا ست الكل يا طاهرة
سلامتك من الام الحيض
من الحرمان.. من القهرة
سلامة نهدك المرضع
سلامة بطنك الخضرا
هناكي وفرخة الوالده
تضمي الولد يا والده
يصونهم لك ويحميهم
يكترهم.. يخليهم
يجمع شملهم بيكي
يتمم فرحتك بيهم
صباح الخير على ولادك
صباح الياسمين والفل
تعيشي ويفنوا حسادك
ويسقوهم كاسات الذل
وبلغ يا سمير غطاس
يا ضيف المعتقل سنوي
بصوتك دا اللي كله نحاس
صبح الخير على الثانوي
وأهلا بيكوا في القلعه
وباللي في الطريق جايين
ما دامت مصر ولاده
وفيها الطلق والعاده
حتفضل شمسها طالعه
برغم القلعه والزنازين
- كتبت في سجن القلعة